Class 3: Lesson 8 – Catechism Hosur

Summary
Lesson 8 കല്പനകളുടെ ലംഘനം: പാപം

ദൈവകല്പനകളുടെ ലംഘനം പാപമാണെന്നും ദൈവത്തെ സ്നേഹിക്കുവാനും ആ സ്നേഹത്തില്‍ നിലനില്‍ക്കുവാന്‍ കല്പനകള്‍ പാലിക്കണമെന്നും ഈ പാഠത്തിലൂടെ വ്യക്തമാക്കുന്നു. തിന്‍മയെ ചെറുത്തുനില്‍ക്കുവാന്‍ നമ്മെ സഹായിക്കുന്ന ദൈവകല്പനകള്‍ അനുസരിക്കേണ്ടതിന്‍റെ ആവശ്യകതയെക്കുറിച്ച് ബോധ്യമുളളവരാകുവാന്‍ ഈ പാഠം സഹായിക്കുന്നു.

Download Audio Lessons

Listen and learn at your convenience. Download these audio lessons to deepen your understanding of faith and catechetical topics on the go.

Click Here

കുട്ടികൾ സ്വന്തമാക്കേണ്ടവ
പാഠബന്ധിത പ്രവർത്തനങ്ങൾ
അനുബന്ധിത പ്രവർത്തനങ്ങൾ

ബോധ്യങ്ങള്‍
- പാപം ദൈവകല്പനകളുടെ ലംഘനമാണ്.
- ദൈവകല്പനകള്‍ ലംഘിക്കുന്നതിനുള്ള പ്രേരണകളാണ് പ്രലോഭനങ്ങള്‍.
- പ്രാര്‍ത്ഥന വഴി പ്രലോഭനങ്ങളെ അതിജീവിക്കാം.
മനോഭാവങ്ങള്‍
- ദൈവമക്കളായ നമ്മള്‍ ദൈവകല്പനകളെ ആദരിക്കണം.
- ദൈവത്തെയും മനുഷ്യരെയും സ്നേഹിക്കാന്‍ നാം എപ്പോഴും ശ്രദ്ധിക്കണം.
- സാത്താന്‍റെ പ്രേരണകളെ എതിര്‍ത്തു തോല്പിക്കണം.
ശീലങ്ങള്‍
- പാപത്തെ ഞാന്‍ എന്നും വെറുക്കും.
- സഹോദരങ്ങളോട് സ്നേഹത്തോടെ പെരുമാറും.
- തെറ്റുചെയ്യാനുള്ള പ്രേരണകളുണ്ടാവുമ്പോള്‍ ഞാന്‍ ഈശോ യോട് പ്രാര്‍ത്ഥിച്ച് ശക്തിനേടും.
അദ്ധ്യാപകന്‍ / അദ്ധ്യാപിക കരുതേണ്ട ബോധനോപാധികള്‍
സമ്പൂര്‍ണ്ണ ബൈബിള്‍, പലതരം ചിത്രങ്ങള്‍.
പാഠാവതരണം
ആദത്തെയും ഹവ്വായെയും പ്രലോഭിപ്പിച്ച സാത്താന്‍ വെറുതെയിരുന്നില്ല. വൃക്ഷത്തിന്‍റെ ഫലം കഴിക്കരുതെന്ന് ദൈവം പറഞ്ഞു. കഴിക്കണമെന്ന് സാത്താന്‍ പറഞ്ഞു. കല്പനകള്‍ നല്‍കിയിട്ട് അതനുസരിക്കണമെന്ന് ദൈവം കല്പിച്ചു. ഇന്നും തെറ്റുകള്‍ ചെയ്യാന്‍ സാത്താന്‍ മനുഷ്യരെ പ്രേരിപ്പിച്ചുകൊണ്ടിരിക്കുകയാണ്. ഈ ആശയം ആമുഖമായി കുട്ടികള്‍ക്കിണങ്ങും വിധം അവതരിപ്പിക്കാം. ദൈവകല്പനകള്‍ ലംഘിക്കുന്നത് സൂചിപ്പിക്കുന്ന ചിത്രങ്ങള്‍ ഉണ്ടെങ്കില്‍ അവ കാണിച്ച് വിശദീകരിക്കാം.

ഉത്തരം കണ്ടെത്താം
- ദൈവകല്പനകളുടെ ലംഘനമാണ് പാപം.
- ദൈവകല്പനകള്‍ ലംഘിക്കുവാന്‍ ഉണ്ടാകുന്ന പ്രേരണകളെയാണ് പ്രലോഭനങ്ങള്‍ എന്നു പറയുന്നത്.
- ദൈവത്തെ സ്നേഹിക്കുന്നവരാവാന്‍ നാം ദൈവത്തിന്‍റെ കല്പ നകള്‍ അനുസരിച്ച് ജീവിക്കണം.
- പത്തുകല്പനകളെ രണ്ടായി സംഗ്രഹിക്കാം. എല്ലാറ്റിനും ഉപരിയായി ദൈവത്തെ സ്നേഹിക്കുക, നിന്നെപ്പോലെ നിന്‍റെ അയല്‍ക്കാരനേയും സ്നേഹിക്കുക.
- ദൈവകല്പനകള്‍
എന്‍റെ തീരുമാനം
നല്ല കുട്ടിയായി വളരാനുള്ള അനുഗ്രഹത്തിനായുള്ള ഒരു കൊച്ചുപ്രാര്‍ത്ഥന കുട്ടികളെ പഠിപ്പിക്കുന്നത് നല്ലതാണ്. അവരുടെ തീരുമാനം നടപ്പിലാക്കാന്‍ അതു സഹായിക്കും.

കാളക്കുട്ടിയുടെ കഥ
പുറപ്പാട് 32:1-6 ല്‍ കാളക്കുട്ടിയെ ആരാധിക്കുന്ന ഭാഗം വിവരിച്ചിട്ടുണ്ട്. അത് കുട്ടികളെ വായിച്ചു കേള്‍പ്പിക്കാം. അവര്‍ ചെയ്ത തെറ്റ് വ്യക്തമാക്കാം.
പ്രാര്‍ത്ഥനയുടെ ശക്തി
ലൂക്കാ 22:39-46 ക്ലാസ്സില്‍ വായിച്ച് പ്രാര്‍ത്ഥനയുടെ ശക്തിയെക്കുറിച്ച് കുട്ടികള്‍ക്ക് ബോധ്യം നല്‍കാം. സമാനമായ അനുഭവകഥകളുണ്ടെങ്കില്‍ പറയുന്നതും നല്ലതാണ്.
പറയാം പറയാം
കുട്ടികള്‍ക്ക് ഉണ്ടാകുന്ന പ്രലോഭനങ്ങള്‍ എന്തൊക്കെയാവാം? സ്വതന്ത്രമായി പറയാന്‍ അനുവദിച്ചാല്‍ ഒത്തിരി കാര്യങ്ങള്‍ പറയും. അവയെ എങ്ങനെ തടയാമെന്നുകൂടി ചര്‍ച്ചചെയ്യാന്‍ മറക്കരുത്.
കൂടുതല്‍ ചോദ്യങ്ങള്‍
- കല്പനകള്‍ നമുക്കു കാണിച്ചു തരുന്നതെന്താണ്?
- സ്വര്‍ഗ്ഗരാജ്യത്തെ ലക്ഷ്യം വച്ചുള്ള യാത്ര തുടരേണ്ട പാളങ്ങള്‍ ഏതൊക്കെ?
- നമുക്ക് പ്രലോഭനങ്ങള്‍ നല്‍കുന്നത് ആരാണ്?
- പ്രലോഭനങ്ങളെ അതിജീവിക്കാന്‍ എന്തുചെയ്യണം?